1. S'anàlisi lògica

S'anàlisi lògica si òcupat de individuare sas funtziones chi ogna prepositzione tenet in intro de sa frase.
Custas funtziones sunt rapresentadas dae sos cumplementos, partes de sa frase chi nde cumpletant su significadu.
S'istrutura elementare de una frase est rapresentada inoghe:

sugetu + predicadu + cumplementu

Sos cumplementos printzipales sunt:

• cumplementu ogetu

  Rispondet a sas pregontas:
  a chie? (cando s'ogetu est una persone),
  ite? (cando s'ogetu est una cosa o un'animale)
  Apo bidu a Frantziscu / Apo mandigadu petza

  Cando s'ogetu est una persone sa a si ponet semper: in dae in antis de nùmene pròpiu,
  de tèrmine de parentela sena artìculu

  Apo saludadu a Danielle / Apo saludadu a frade tuo

  Ma b'at faeddos in ue sa a si ponet semper, bastis chi s'ogetu siat una persone:

  Apo iscutu a sos pipios / Ant mortu a su Re

  Sa a si usat finas cando s'ogetu est un'animale de propiedade, pro nàrrere unu cane o unu gatu:

  Como iscapo a Pilurtzu

  E si usat puru pro inditare una bidda, o tzitade:

  Già so una die sena bìdere a Casteddu

• cumplementu de ispetzificatzione

  Rispondet a sas pregontas: de chie? de ite?
  Su fìgiu de su sìndigu / Sas àulas de s'Universidade

• cumplementu de termine

  Rispondet a sas pregontas: a chie? a ite?
  So iscriende a cuddos amigos / So pensende a s'iscola

• cumplementu de modu

  Rispondet a sa pregonta: comente?
  At caminadu in presse

• cumplementu de istadu in logu

  Rispondet a sa pregonta: in ue?
  Est in domo sua

• cumplementu de motu a logu

  Rispondet a sa pregonta: a ue?
  Fiat andende a sa butega

• cumplementu de motu dae logu

  Rispondet a sa pregonta: dae ue?
  Nd'est bènnidu dae mare

• cumplementu de tempus determinadu

  Rispondet a sa pregonta: cando?
  Oe non tèngio gana de fàghere nudda

• cumplementu de tempus sighidu

  Rispondet a sa pregonta: pro cantu?
  Unu est minorenne finas a sos degheoto annos

• cumplementu de agente

  Rispondet a sa pregonta: dae chie?
  Est istadu fatu dae issu / Sas fògias sunt mòvidas dae su bentu

Esertzìtzios

Sèbera sa risposta giusta

Ocannu coladu semus andados a Franza

Ocannu coladu semus andados in Frantza

Ocannu coladu semus andados a Frantza

Sèbera sa risposta giusta

S'istàdiu de s'Inter est a Milanu

S'istàdiu de s'Inter est in Milanu

S'istadiu de s'Inter est in Milanu