Limba > Cumplementos

2. Su testu iscritu

Su testu est s'unione de elementos ligados a pare dae raportos ispetzìficos, chi nde garantint sa coesione.
Custa coesione si podet otènnere faghende cuncordare sos elementos nominales e verbales, comente inoghe:

Una bella pitzoca (e non Una bellu pitzoca)

Opuru si podet otènnere eliminende o repitende o cambiende elementos de sa frase giai mentuados,
comente in custu casu:

Apo bidu a Luisi. M'at pregontadu comente istaia. L'apo rispostu: «Bene».

In sa segunda frase amus eliminadu Luisi e in sa de tres l'amus cambiadu cun lu.

O si nono sa coerèntzia la podimus otènnere finas cun avèrbios e congiuntziones.
Sos rinvios intre partes noas de sa frase e parte giai mentuadas funtzionant cun protzedimentos mutidos anàfora e catàfora.
S'anàfora rinviat a una cosa giai mentuada:

Su cane, l'apo iscapadu pagora

Inoghe su pronùmene lu est anafòricu ca si riferit a su cane

Sa catàfora rinviat a una cosa chi benit a pustis:

L'isco, chi ses bènnidu

Inoghe lu est catafòricu ca si riferit a chi ses bènnidu

A prus de sa coesione, unu testu l'abbisòngiat sa coerèntzia, est a nàrrere de un'òrdine giustu de sas partes costitutivas. Mentras sa coesione est unu fatu grammaticale, sa coerèntzia est prus unu fatu pragmàticu, est a nàrrere ca semus nois chi b'agatamus su sensu in unu testu, cunforma a s'esperièntzia personale nostra.
Pro nàrrere:

Sa pipia at pedidu a sa mama de li comporare sas iscarpitas noas (testu coesu e coerente)
Sa pudda at pedidu a sa cadrea de li fàghere s'arantzada (testu coesu e non coerente)
Sa pudda at pedidu a su cadrea de lis fàghere s'arantzada (testu non coesu e non coerente)

B'at diferentes genias de testos. Sos printzipales sunt:

Su testu narrativu, chi a su sòlitu tenet su tempus a su passadu e est ricu de anàforas
Su testu poèticu
Su testu descritivu
Su testu teatrale

Limba e Contos de Sardigna

Limba > Cumplementos

2. Su testu iscritu